Aprelin 26-da "RMP" (Risk Management Professionals) İctimai Birliyi tərəfindən "Hyatt Regency" hotelində 28 Aprel - Ümumdünya Əməyin Mühafizəsi Günü münasibətilə 4-cü İllik SƏTƏM (Sağlamlıq, Əməyin Təhlükəsizliyi və Ətraf Mühitin Mühafizəsi) Konfransı təşkil olunub.

Əsas məqsədi əmək fəaliyyətinin keyfiyyətinin artırılması, əməyin mühafizəsi, risklərin qarşısının alınması ilə bağlı təlimlərin keçirilməsi və məsləhət xidmətlərinin göstərilməsi olan "RMP"nin rəhbəri Anar Məlikov bildirib ki, Beynəlxalq Əmək Təşkilatının (BƏT) təşəbbüsünə əsasən işçilərin sağlam və təhlükəsiz əmək şəraiti ilə təmin olunmasına ictimaiyyətin diqqətinin artırılması üçün 2003-cü ildən 28 Aprel - Ümumdünya Əməyin Mühafizəsi Günü kimi qeyd edilir. Konfransın məqsədi bu sahənin öndə gedən mütəxəssislərini bir araya gətirmək, cəmiyyəti maarifləndirməkdir. İlk konfrans 2019-cu ildə keçirilib, daha sonra COVID19 pandemiyası səbəbindən fasilə yaranıb. SƏTƏM sahəsində tədbirlərin vacibliyini nəzərə alaraq dövlət sektoru və iri şirkətlərlə birgə konfransın illik qaydada keçirilməsi zərurəti yaranıb. Əmək mühafizəsi sahəsində ümumi qaydalar əsasən beynəlxalq standartlara əsaslanır. ABŞ-da, Böyük Britaniyada bununla bağlı qanunvericilik formalaşdırlıb, işçilərin sağlamlığımım qorunmasına, iş şəraitinin yaxşılaşdırılmasına böyük önəm verilir. Azərbaycanda bununla bağlı sırf həmin tələblərə uyğunlaşma prosesi gedir və ya tövsiyə xarakterli təlimat tətbiq olunur.

"ACWA Power" şirkətinin Əməyin mühafizəsi, təhlükəsizlik və ətraf mühitin mühafizəsi üzrə meneceri Vüsal Əfəndizadə qeyd edib ki, enerji keçidi sahəsində lider və dəniz suyunun duzsuzlaşdırılması üzrə dünyanın ən böyük özəl şirkəti Azərbaycanda 240 MVt gücündə Xızı-Abşeron Külək Elektrik Stansiyasını inşa edir. 2004-cü ildə Səudiyyə Ərəbistanının Ər-Riyad şəhərində yaradılmış "ACWA Power" Yaxın Şərq, Afrika, Mərkəzi Asiya və Cənub-Şərqi Asiya da daxil olmaqla 13 ölkədə fəaliyyət göstərir. Lokalizasiyaya xüsusi diqqət yetirən "ACWA Power" 4 000-dən çox işçi heyəti ilə təmsil olunur və onların 60 faizi fəaliyyət göstərdiyi ölkələrin yerli əhalisidir.

"Aztelekom" MMC-nin sağlamlığın təşkili və əməyin mühafizəsi şöbəsinin müdiri Qasım Əliyev bildirib ki, genişzolaqlı və mobil şəbəkə təhlilləri üzrə qlobal şirkət olan "Ookla"nın "Ən sürətli Sabit Şəbəkə üzrə Speedtest Mükafatı" (Speedtest Award for Fastest Fixed Network) və rəqəmsal transformasiya məsələləri üzrə 45 illik beynəlxalq təcrübəyə sahib olan "İDATE" şirkətinin "Ev Təsərrüfatlarının Genişzolaqlı İnternetə Qoşulmasının İnkişafı ilə Bağlı Ən Yaxşı Təcrübə" (Best Practice of Home Broadband Development Award) mükafatlarına layiq görülüb. Hər iki mükafat ölkə tarixində ilk dəfə olaraq sabit şəbəkə internet provayderinə təqdim edilib.

"PMD Projects" şirkətinin SƏTƏM şöbəsinin meneceri Elgün Səfiyarov deyib ki, şirkətin icra etdiyi ən məşhur layihələr sırasına Zəfər Parkı, "Hilton Garden Hotel"i daxildir. O əlavə edib ki, həmçinin Şuşa şəhərində forması 8, minarələri isə 11 rəqəmini əks etdirəcək yeni məscidin inşası həyata keçirilir. 2026-cı ildə Azərbaycan Prezidenti İlham Əliyevin iştirakı ilə məscidin açılışı planlaşdırılır.