Novruz bayramının üçüncü çərşənbəsi olan Yel çərşənbəsində Ekologiya və Təbii Sərvətlər Nazirliyinin təşkilatçılığı ilə Bakının Müşfiqabad qəsəbəsində ağacəkmə aksiyası keçirilib.
Kaspi liseyinin, 160 nömrəli Klassik gimnaziyanın şagirdlərinin, ekokönüllülərin, o cümlədən Yaşama Dəstək Mərkəzinin təşəbbüsü ilə dəvət edilmiş xüsusi qayğıya ehtiyacı olan uşaqların iştirakı ilə keçirilən aksiya çərçivəsində Abşeron yarımadasının torpaq-iqlim şəraitinə uyğun Eldar şamı və zeytun ağacları əkilib.
Ağacəkmə aksiyasının keçirilməsində məqsəd yaşıllıq sahələrinin artırılmasını təşviq etmək, ətraf mühitin mühafizəsi, iqlim dəyişikliyi ilə mübarizəyə töhfə verməkdir.