Azərbaycan Həmkarlar İttifaqları Konfederasiyasının ölkəmizin səfalı guşələrində istirahət mərkəzləri və sanatoriya-kurort müəssisələri fəaliyyət göstərir. Belə müəssisələrdən biri də “Şıx” sanatoriyasıdır.Gözəl dəniz mənzərəsi, təmiz havası, müasir üslubda arxitekturası ilə diqqət çəkən sanatoriyada peşəkar tibbi personal tərəfindən dayaq-hərəkət aparatı xəstəliklərinin müalicəsi həyata keçirilir. Burada geniş, işıqlı və rahat şəraiti olan 175 çarpayılıq 2 yataq korpusu, müalicə korpusu, yeməkxana və digər tikililər mövcuddur.

Müalicə bazası kliniki-diaqnostik laboratoriya, funksional diaqnostika, müalicəvi idman, masaj və müxtəlif profilli tibbi kabinetlərdən ibarətdir. Burada xəstəlik tarixi, müalicə kabinetlərinin fəaliyyəti, mühasibatlıq və yeməkxana pilot layihə olan mərkəzləşmiş smart sistemə qoşulub.Sanatoriyada əsasən artrit, poliartrit və revmatoid artrit, osteoxondroz, yayılmış osteoxondrozlar, bel-oma radikuliti, spondiloartrit, xroniki mialgiya, oynaqların kontrakturası, həmçinin podaqrik artritin müalicəsi aparılır.

“Şıx” sanatoriyasının əsas müalicə vasitəsi Bibiheybət ərazisində birbaşa mənbədən çıxarılan və yüksək minerallılıqla fərqlənən hidrogen-sulfidli sudur. Bu müalicəvi sudan hidroterapiya, fizioterapiya, valneterapiya kimi müalicə prosedurlarında istifadə olunur.Hidroterapiya müalicə proseduruna sualtı duş-masaj, hovuzda dartma-hidrotraksiya, burulğanlı vannalar daxildir. Fizioterapiyada isə elektroterapiya, maqnitoterapiya, ultrasəs terapiyası, darsonvalizasiya, lazeroterapiya tərtbiq edilir. Təbii mineral su vannaları və palçıq terapiyası balneoterapiya, eləcə də kükürdlü su vannaları, naftalan və parafin terapiyası da müalicə proseduruna daxildir.

Sanatoriyada pasiyentlər həmçinin ozonoterapiya, iynəsancma, limfodrenaj, oynaqdaxili terapiya kimi əlavə xidmətlərdən də yararlana bilərlər.