Keçmiş SSRİ dövründə əhalinin içməli su ilə təchizatının yaxşılaşdırılması üçün Bakı şəhərinin əksər yerlərində, xüsusilə də paytaxtın Sabunçu rayonunda su anbarları tikilərək istifadəyə verilib. Bununla da içməli su qıtlığının qarşısı müəyyən dərəcədə alınıb. Baxımsızlıq və nəzarətsizlik üzündən sözügedən su anbarlarından bəziləri artıq istifadəyə yayrarsız vəziyyətə düşüb.

Məsələn, elə götürək Sabunçu rayonunun Bakıxanov qəsəbəsi, Muxtar Fətəliyev küçəsi 87 ünvanında yerləşən su anbarını.

İyirmi ildən çoxdur ki, baxımsız və nəzarətsiz qalmış bu anbar yerli bina sakinlər tərəfindən atılan müxtəlif təyinatlı tullantıların poliqonuna çevrilib. Orada hər gün qalaq-qalaq yığılmış, eləcə də ətrafa dağılmış məişət tullantıları ürəkağrıdıcı mənzərə yaradır. Üstəlik, bu qanunsuz poliqona zərərverici həşəratlarla yanaşı sahibsiz heyvanların daraşması, əsən küləyin zibilləri uzaq məsafələrə uçurması, ərazidən kəskin üfunət qoxusunun gəlməsi və sair bu ərazinin ciddi antisanitariya mənbəyinə çevrilməsindən xəbər verir.

Ayrıca haqqında danışılan tullantıların uzun müddət daşınmaması, poliqonun təmizlənməməsi və dezinfeksiya edilməməsi üzündən yağış yağdıqdan sonra oradan axan çirkli sular ətrafda torf bataqlığı yaradır. Bütün bunlar yoluxucu xəstəliklərin yayılması üçün əsas mənbələrdir. Amma…

Amması budur ki, istismar müddəti başa çatmış su anbarında və onun ətrafında yaranmış tükürpədici, dəhşətli və acınacaqlı vəziyyətə yerli MİS və Bələdiyyə, o cümlədən digər müvafiq dövlət qurumları əhəmiyyət vermir. 

Ümid edirik ki, Sabunçu Rayon İcra Hakimiyyəti, Bakıxanov qəsəbə bələdiyyəsi, yerli MİS və digər aidiyyatı orqanlar sözügedən su anbarının gələcək taleyinə aydınlıq gətirəcək, qanunsuz zibil poliqonu ləğv ediləcək, mağaranı xatırladan su anbarının yan- yörəsində olan söküntü və dağıntıları bərpa edəcək.

Əgər bunlar olarsa , orada yaşayan bina sakinlərinin sağlamlığının qeydinə qalınacaq və ən əsası uşaqların təhlükəsizliyi təmin olunacaq.

Analoq.az