2020-ci il noyabrın 6-sı Vətən müharibəsinin gedişində Azərbaycan Ordusunun hərbi üstünlüyünü möhkəmləndirdiyi, düşmənin müdafiə və təminat sisteminə ciddi zərbələr endirdiyi günlərdən biri oldu. Cəbhənin Ağdərə, Ağdam, Xocavənd və Qubadlı istiqamətlərində döyüşlər davam edir, işğalçı qüvvələrin müqaviməti getdikcə zəifləyirdi. Azərbaycan əsgərinin qarşısında duran əsas vəzifə mürəkkəb relyef və iqlim şəraitində irəliləyərək işğal altında olan torpaqlarımızı azad etmək idi.

Noyabrın 5-i ərzində və 6-na keçən gecə Ermənistan silahlı qüvvələri cəbhənin müxtəlif istiqamətlərində Azərbaycan Ordusunun mövqelərini, eləcə də yaşayış məntəqələrimizi atıcı silahlardan, toplardan və minaatanlardan atəşə tutdu. Müdafiə Nazirliyinin noyabrın 6-da yaydığı məlumata görə, əsas döyüşlər Ağdərə, Ağdam, Xocavənd və Qubadlı istiqamətlərində gedirdi. Düşmən bölmələri canlı qüvvə və texnika itkiləri verərək bəzi mövqelərdən geri çəkilməyə məcbur olmuşdu.

Ermənistan silahlı qüvvələri dövlət sərhədində də təxribatlarını davam etdirirdi. Berd, Çəmbərək və Vardenis istiqamətlərindən Tovuz, Gədəbəy və Daşkəsən rayonlarında yerləşən hərbi mövqelərimiz minaatanlardan və atıcı silahlardan atəşə tutuldu. Tərtər və Goranboy rayonlarının yaşayış məntəqələri də düşmənin hücumlarına məruz qaldı.

Günün mühüm hərbi hadisələrindən biri Xankəndi yaxınlığında yerləşən silah-sursat anbarında baş verən partlayış oldu. Müdafiə Nazirliyinin məlumatına görə, anbardan yük avtomobillərinə döyüş sursatları yüklənərkən onların partlaması güclü yanğına səbəb olmuş, alov qısa müddətdə anbara keçərək böyük partlayışla nəticələnmişdi. Həmin anbar Ağdərədə yerləşən Ermənistan silahlı qüvvələrinin 10-cu dağatıcı diviziyasının və 5-ci dağatıcı alayının artilleriya və digər bölmələrinin silah-sursat təminatında mühüm rol oynayırdı. Hadisə düşmənin hərbi təminat sisteminə ciddi zərbə vurdu.

Həmin gün Müdafiə Nazirliyi Ermənistan mətbuatında Azərbaycan Ordusunun guya Xankəndini atəşə tutması barədə yayılan məlumatları da təkzib etdi. Nazirliyin açıqlamasında bu xəbərlərin Ermənistanın törətdiyi hərbi cinayətlərdən diqqəti yayındırmağa hesablanmış dezinformasiya olduğu bildirildi.

Qubadlı-Laçın istiqamətində gedən döyüşlərdə isə Azərbaycan Ordusunun atəş zərbələrinə tab gətirə bilməyən Ermənistan bölmələri mövqelərini tərk edərək geri çəkildi. Müdafiə Nazirliyinin məlumatına əsasən, Ermənistandan gətirilərək müdafiə zonasına yerləşdirilmiş 556-cı və 522-ci motoatıcı alayların bölmələri onlara tapşırılmış müdafiə hədlərinə çıxmamışdı. Şəxsi heyətin hazırlıqsızlığı, təcrübəsizliyi və intizamsızlığı düşmənin müdafiə sistemindəki ciddi problemləri üzə çıxarırdı.

Noyabrın 6-da Hərbi İnformasiya Mərkəzində keçirilən brifinqdə Müdafiə Nazirliyinin mətbuat katibi, polkovnik-leytenant Anar Eyvazov cəbhədəki vəziyyət və düşmənin itkiləri barədə ətraflı məlumat verdi. Bildirildi ki, Azərbaycan Ordusu Ağdam və Ağdərə istiqamətlərində təşkil etdiyi pusqular və dəqiq atəş zərbələri nəticəsində düşmənin hərbi kolonunu, artilleriya batareyasını və silah-sursat anbarını darmadağın edib.

Məhv edilən hədəflər sırasında düşmənin komandir heyəti də daxil olmaqla xeyli sayda canlı qüvvəsi, bir rabitə avtomobili, sursatla dolu iki “KamAZ” yük maşını və qoşqusunda top olan üç “Ural” avtomobili vardı. Bundan başqa, digər sursat və artilleriya qurğuları da sıradan çıxarılmışdı.

Tərtər rayonunun işğal altında olan Göyarx kəndinin ərazisində düşmənin atəş nöqtələrinə çıxardığı minaatan heyəti də ordumuzun dəqiq zərbəsi ilə məhv edildi. Ağdərə istiqamətində isə düşmənin atəş mövqeyinə çıxardığı D-30 haubitsasının heyəti sıradan çıxarıldı. Bu hadisələr Müdafiə Nazirliyinin həmin gün yaydığı məlumatlarda və videogörüntülərdə əksini tapdı.

Brifinqdə Anar Eyvazov Azərbaycan Ordusunun qarşısında Ermənistan silahlı qüvvələri ilə yanaşı, xaricdən cəlb edilmiş muzdlu və əcnəbi döyüşçülərin də olduğunu bildirdi. Nazirliyin açıqlamasında bu qrupların döyüş təcrübəsi və dil problemi səbəbindən qarşılıqlı fəaliyyətində çətinliklər yarandığı, bəzi döyüşçülərin Azərbaycan Ordusu ilə döyüşə girməkdən imtina etdiyi barədə məlumatların olduğu qeyd edildi. Onlara silahı yerə qoyaraq təslim olmaq çağırışı edildi.

Həmin gün Müdafiə Nazirliyi Füzuli rayonunun işğaldan azad edilmiş kəndlərindən videogörüntülər də yayımladı. Bu görüntülər torpaqlarımızın azadlığı uğrunda aparılan əməliyyatların nəticələrini ictimaiyyətə çatdırırdı. 

Müharibənin ağır nəticələri noyabrın 6-da Baş Prokurorluğun açıqladığı statistikada da öz əksini tapdı. Qurumun məlumatına görə, sentyabrın 27-dən noyabrın 6-dək Ermənistan silahlı qüvvələrinin yaşayış məntəqələrimizi ağır artilleriya və raket sistemlərindən atəşə tutması nəticəsində 92 mülki şəxs həlak olmuş, 404 nəfər yaralanmışdı. Həmçinin 3064 fərdi yaşayış evi, 100 çoxmənzilli yaşayış binası və 504 mülki obyekt yararsız vəziyyətə düşmüşdü. Bu rəqəmlər müharibənin dinc əhali və mülki infrastruktur üçün yaratdığı faciənin miqyasını göstərirdi.

Həmin gün Prezident İlham Əliyev BBC News-a müsahibə verdi. Müsahibə noyabrın 6-da keçirilsə də, noyabrın 9-da Prezidentin rəsmi internet səhifəsində yayımlandı. Dövlətimizin başçısı jurnalistin Dağlıq Qarabağ və ətraf rayonlar uğrunda mübarizənin davam etdirilməsi ilə bağlı sualına cavabında Azərbaycanın mövqeyinin müharibənin ilk günlərindən aydın olduğunu bildirdi. Ermənistan işğal olunmuş ərazilərdən qoşunlarını çıxarmaq barədə öhdəlik götürəcəyi təqdirdə Azərbaycanın döyüşləri dayandırmağa hazır olduğunu vurğuladı.

Prezident danışıqlar prosesində nəzərdə tutulan mərhələləri də izah etdi. Əvvəlcə beş rayonun, növbəti mərhələdə isə iki rayonun boşaldılmasının əsas prinsiplərdə əksini tapdığını xatırlatdı. Beş rayondan dördünün artıq azad edildiyini bildirən İlham Əliyev Ağdamın qalan hissəsinin, Kəlbəcərin və Laçının boşaldılması ilə bağlı konkret öhdəlik götürüləcəyi təqdirdə Azərbaycanın dayanmağa hazır olduğunu qeyd etdi. Müsahibədə məcburi köçkünlərin doğma yurdlarına qayıtması və Qarabağda yaşayan erməni əhalisinin gələcək taleyi məsələlərinə də toxunuldu.

Noyabrın 6-da Prezident İlham Əliyevin imzaladığı digər mühüm sənəd Ermənistanın hərbi təcavüzü nəticəsində mülki əhaliyə, dövlət əmlakına, infrastruktura və sahibkarlıq subyektlərinə dəymiş ziyanın qiymətləndirilməsi və aradan qaldırılması ilə bağlı Sərəncam oldu. Sənədə əsasən, Baş nazir Əli Əsədovun sədrliyi ilə Dövlət Komissiyası yaradıldı. Komissiyaya iki ay müddətində dəymiş ziyanın qiymətləndirilməsi, dağıdılmış obyektlərin bərpası üçün tələb olunan vəsait barədə təkliflərin hazırlanması və vahid məlumat bazasının yaradılması tapşırıldı. Bu qərar dövlətin müharibənin nəticələrinin aradan qaldırılması və zərərçəkmiş ərazilərin gələcək bərpası istiqamətində də hazırlıqlı olduğunu nümayiş etdirirdi.

Beləliklə, noyabrın 6-da cəbhədəki hərbi uğurlar Azərbaycanın siyasi və diplomatik mübarizəsi ilə paralel davam edirdi. Düşmənin hərbi kolonları və artilleriya vasitələri sıradan çıxarılır, Qubadlı-Laçın istiqamətində mövqeləri zəifləyir, onun təminat sistemində ciddi problemlər yaranırdı. Azərbaycan isə həm döyüş meydanında, həm də beynəlxalq informasiya məkanında öz haqlı mövqeyini qətiyyətlə müdafiə edirdi.

Lakin bu mübarizənin qarşıda daha çətin və taleyüklü mərhələsi vardı. Qarabağın tacı, milli-mənəvi yaddaşımızın ayrılmaz parçası olan Şuşa uğrunda döyüşlər artıq həlledici həddə yaxınlaşırdı. Mürəkkəb dağlıq relyef, sıx meşələr və düşmənin möhkəmləndirilmiş müdafiə mövqeləri Azərbaycan əsgərinin qarşısında ciddi sınaqlar yaradırdı. Xüsusi təyinatlılarımızın çətin şəraitdə apardığı əməliyyatlar isə Şuşaya doğru irəliləyişin əsasını qoyurdu.