14 oktyabr 2020-ci il Vətən müharibəsinin tarixində həm döyüş meydanında qazanılan uğurlar, həm də Azərbaycan dövlətinin qətiyyətli mövqeyi ilə yadda qaldı. Bu gün xalqımızın yaddaşına yalnız azad edilən kəndlərin adları ilə deyil, həm də mülki əhalimizin təhlükəsizliyini təhdid edən düşmən raketlərinin məhv edilməsi, ordumuzun döyüş qabiliyyəti və Ali Baş Komandanın xalqa çatdırdığı qürurverici xəbərlərlə həkk olundu.

Vətən müharibəsinin on səkkizinci günü Azərbaycan əsgərinin iradəsi ilə xalqın qələbə əzminin bir-birini tamamladığı günlərdən biri idi. Cəbhədə ağır döyüşlər davam edir, Ermənistan silahlı qüvvələrinin hücum cəhdlərinin qarşısı alınır, işğal altında qalan torpaqlarımızın azadlığı uğrunda mübarizə yeni mərhələyə qədəm qoyurdu. Azərbaycan Ordusu qarşıya qoyulan hərbi vəzifələri yerinə yetirməklə yanaşı, ölkəmizin şəhər və kəndlərini düşmənin raket təhlükəsindən qorumaq üçün də mühüm əməliyyatlar həyata keçirirdi.

Günün ən qürurverici xəbərlərindən biri Prezident, Müzəffər Ali Baş Komandan İlham Əliyevin xalqa çatdırdığı azadlıq müjdəsi oldu. Dövlət başçısı rəsmi səhifəsində böyük sevinc hissi ilə bildirdi ki, Azərbaycan Ordusu Füzuli rayonunun Qaradağlı, Xatunbulaq və Qarakollu, Xocavənd rayonunun Bulutan, Məlikcanlı, Kəmərtük, Təkə və Tağaser kəndlərini işğaldan azad edib. Ali Baş Komandan bu xəbəri “Eşq olsun Azərbaycan Ordusuna! Qarabağ Azərbaycandır!” sözləri ilə tamamladı.

Bu müraciət adi hərbi məlumatdan daha böyük məna daşıyırdı. Prezidentin xalqımıza çatdırdığı hər bir azadlıq xəbəri illərlə doğma torpaqlarından ayrı düşmüş insanların qəlbində yeni ümidlər oyadır, Azərbaycan əsgərinin şücaətinə olan inamı daha da möhkəmləndirirdi. Dövlət başçısının qürurla səsləndirdiyi kənd adları hər bir azərbaycanlı üçün Vətənə qayıdışın, tarixi ədalətin bərpasının və milli iradənin təntənəsinin ifadəsi idi. Həmin adların hər biri bir yurdun yaddaşı, bir elin taleyi, bir xalqın torpaq sevgisi demək idi. 

Füzuli və Xocavənd rayonlarının səkkiz kəndinin azad edilməsi Azərbaycan Ordusunun işğal altındakı ərazilərdə irəliləyişinin davam etdiyini göstərirdi. İllərlə doğma yurdlarının yolunu gözləyən insanların arzusu hər yeni qələbə xəbəri ilə gerçəyə bir qədər də yaxınlaşırdı. 

Həmin günün digər mühüm hadisəsi düşmənin Azərbaycanın mülki əhalisini və yaşayış məntəqələrini hədəfə alan raket təhlükəsinin aradan qaldırılması oldu. Müdafiə Nazirliyinin rəsmi məlumatına görə, Ermənistan silahlı qüvvələrinə məxsus əməliyyat-taktiki ballistik raket kompleksləri Azərbaycanın Gəncə, Mingəçevir və digər şəhərlərinə yönəldilmişdi. Ordumuz kəşfiyyat məlumatları əsasında həmin komplekslərin atəşə hazır vəziyyətə gətirildiyini müəyyənləşdirərək qabaqlayıcı zərbələr endirdi.

Müdafiə Nazirliyinin oktyabrın 14-də yaydığı məlumatda həmin gün gecə iki, səhər isə daha bir olmaqla ümumilikdə üç “Elbrus” ballistik raket kompleksinin raketləri ilə birlikdə aşkar edilərək məhv edildiyi bildirildi. Bu əməliyyat Azərbaycan Ordusunun yalnız cəbhədə döyüşən bölmələrinin deyil, ölkə əhalisinin təhlükəsizliyini təmin edən hərbi qüvvələrinin də yüksək hazırlığını nümayiş etdirirdi. Əgər həmin raketlər buraxılsaydı, dinc sakinlərin həyatı və mülki infrastruktur ciddi təhlükə ilə üzləşə bilərdi. Ordumuzun qabaqlayıcı tədbirləri bu təhlükənin qarşısının alınmasına yönəlmişdi. 

Müdafiə Nazirliyi həmin gün məhv edilmiş raket komplekslərinin start mövqelərinə çıxarılmasını əks etdirən videogörüntüləri də ictimaiyyətə təqdim etdi. Xarici diplomatik nümayəndələr üçün təşkil olunan brifinqdə isə Azərbaycan Hərbi Hava Qüvvələrinin Qərargah rəisi, general-mayor İkram Əliyev bu silahların texniki xüsusiyyətləri və yaratdığı təhlükə barədə məlumat verdi. Beləliklə, Azərbaycanın həyata keçirdiyi əməliyyatların səbəbləri və mülki əhalini qorumaq məqsədi beynəlxalq nümayəndələrin diqqətinə çatdırıldı.

Cəbhənin Füzuli istiqamətində Ermənistan silahlı qüvvələrinə məxsus daha bir pilotsuz uçuş aparatının məhv edilməsi də günün rəsmi hərbi xəbərləri sırasında yer aldı. Bu fakt ordumuzun düşmənin hava vasitələrinə qarşı mübarizəni davam etdirdiyini göstərirdi. Hərbi əməliyyatların gedişində kəşfiyyat, hava hücumundan müdafiə və zərbə imkanlarının səmərəli istifadəsi qoşunlarımızın mövqelərinin qorunması baxımından mühüm əhəmiyyət daşıyırdı. 

Oktyabrın 14-də Prezident İlham Əliyev Fransanın “France 24” televiziya kanalına müsahibə verərək müharibənin gedişi, humanitar atəşkəsin pozulması və Azərbaycanın mövqeyi barədə danışdı. Dövlət başçısı bildirdi ki, Azərbaycan özünümüdafiə hüququndan istifadə edir, hərbi hədəflər diqqətlə müəyyənləşdirilir və ölkəmiz mülki insanları qəsdən hədəfə almır. Prezident Ermənistanın atəşkəsi pozması və azad edilmiş əraziləri geri qaytarmaq cəhdlərinin yeni itkilərə səbəb olacağı barədə xəbərdarlıq etdi.

Bu müsahibə Azərbaycanın haqq səsinin beynəlxalq ictimaiyyətə çatdırılması baxımından mühüm əhəmiyyət daşıyırdı. Azərbaycan bir tərəfdən işğal altındakı torpaqlarını azad etmək üçün mübarizə aparır, digər tərəfdən müharibənin səbəblərini, hərbi əməliyyatların məqsədlərini və mülki əhalinin qorunması ilə bağlı mövqeyini dünya ictimaiyyətinə izah edirdi. 

Günün hərbi mənzərəsini tamamlayan digər mühüm məqam düşmənin raket buraxıcı qurğularının zərərsizləşdirilməsi idi. Müdafiə Nazirliyinin məlumatları göstərirdi ki, Azərbaycan Ordusu yalnız artıq baş vermiş hücumlara cavab verməklə kifayətlənmir, yeni raket zərbələrinin qarşısını almaq üçün də əməliyyatlar aparırdı

14 oktyabrın tarixi mənası məhz bu hadisələrin vəhdətində üzə çıxırdı. Ali Baş Komandanın xalqa çatdırdığı azadlıq xəbərləri, Azərbaycan əsgərinin döyüş meydanındakı hünəri, mülki əhalinin təhlükəsizliyi naminə həyata keçirilən əməliyyatlar və dövlətin beynəlxalq müstəvidə nümayiş etdirdiyi qətiyyət eyni məqsədə xidmət edirdi: torpaqlarımızın işğaldan azad olunması və Azərbaycanın ərazi bütövlüyünün bərpası.