"... Son 15 il ərzində Azərbaycanda  hərtərəfli inkişaf təmin edilmişdir. Bunun əsas şərti ondan ibarətdir ki, biz ulu öndərin yolu ilə gedirik. Onun qoyduğu yeganə düzgün yoldur və Azərbaycanın  müstəqillik tarixi bunun əyani sübutudur". Bunu Prezident İlham Əliyev 2018-ci il aprelin 18-də   Milli Məclisdə keçirilən andiçmə mərasimində qürurla söylədi.

Dövlət başçısının  bu çıxışı proqram xarakterli idi,  çünki o, xalqı qarşısında növbəti illər üçün  yeni öhdəliklər götürdü, vədlər, ölkənin  inkişaf hədəfləri ilə bağlı  mesajlar verdi, dövlət idarəçiliyi, kadr siyasəti, qanunçuluğun təmin edilməsi, bürokratiyanın, korrupsiyanın, rüşvətxorluğun aradan qaldırılması və digər sahələrdə islahatların vacibliyini qeyd etdi.  Bir sözlə, Prezident yeni bir Azərbaycan uğrunda əhəmiyyətli mərhələyə qədəm qoymaq niyyətində olduğunu bəyan etdi. Tezliklə cəmiyyətin  bütün təbəqələrini əhatə edən, ciddi xarakter daşıyan  islahatlara başlanıldı və tədricən  bu islahatlar öz bəhrəsini verdi...

Prezident İlham Əliyev hakimiyyətə gəldiyi ilk gündən Azərbaycan dövləti üçün yeni bir səhifə açdı, bu səhifə hər il, hər ay, hər gün təzələndi və ölkəmizin möhtəşəm  bir uğur hekayəsi yarandı.  Azərbaycanı regionun lider dövlətinə çevirmək, onun beynəlxalq nüfuzunu artırmaq, dövlətimizi gücləndirmək, onu daha  qüdrətli etmək, əsası ulu öndər tərəfindən qoyulan neft strategiyasının beynəlxalq səviyyədə uğurlu gedişini təmin etmək kimi vəzifələri həyata keçirmək,  dövlətimizin dayaqlarını möhkəmləndirmək, ölkənin sosial, sosial-iqtisadi həyatı ilə bağlı   problemlərin həllinə nail olmaq üçün ən səmərəli üsul və vasitələr seçildi. Ərazisinin 20 faizi Ermənistan tərəfindən işğal edilən, 1 milyondan çox qaçqın və məcburi köçkünü olan bir vaxtda  bu ağır sosial yükü çiynində daşıyaraq onları  həm də çadır şəhərciklərindən  müasir evlərə köçürmək, həyat şəraitlərini yaxşılaşdırmaq, Azərbaycanın iqtisadi qüdrətini gücləndirmək üçün olduqca düşünülmüş və təkamülə söykənən islahatları daha ciddi şəkildə aparmaq, digər tərəfdən,  işğal olunmuş torpaqlarımızın  azad edilməsi üçün  beynəlxalq səviyyədə diplomatik  müstəvidə mübarizə  aparmaq dövlət  başçısının fəaliyyətinin əsas istiqaməti oldu. Beynəlxalq güclərin Ermənistanın yanında olduğu, Azərbaycana qarşı ikili standartlar  nümayiş etdirildiyi, işğala məruz qalan torpaqlarımızın erməniləşdirilməsi üçün ən müxtəlif  səviyyələrdə düşmənə yardım  göstərildiyi çətin bir dövrdə bütün bunları gündəlikdə  saxlamaq, müxtəlif platformalarda, beynəlxalq təşkilatlarda, həm daxili, həm də xarici  auditoriyalarda qətiyyətli, cəsarətli bəyanatlar vermək,  "Azərbaycan heç bir zaman öz ərazisində ikinci bir qondarma dövlətin yaradılmasına imkan verməyəcək" kimi bəyanatlar  səsləndirərək onun  arxasında durmaq, güclü ordu yaratmaq dövlət başçısının  qarşıya qoyduğu ciddi vəzifələr idi və bu məsul vəzifələrin yerinə yetirilməsi 2020-ci ildə Azərbaycanı qələbəyə qovuşdurdu.  30 illik erməni işğalına son qoyuldu,  bu zəfər savaşında Prezident İlham Əliyev özünü Ali Baş Komandan kimi  yüksək səviyyədə təsdiq etdi, Azərbaycanı qalib dövlətə, xalqımızı qalib xalqa  çevirdi.  2020-ci ildən sonra isə Azərbaycan daha fərqli,  yüksək inkişaf mərhələsinə qədəm qoydu.

Dövlət başçısı hər zaman xalqına arxalandı. Xalq isə öz rəhbərinin siyasətini dəstəklədi. Bu isə bir lider kimi ona Azərbaycanın uğurlu, dayanıqlı inkişafını  təmin etmək üçün güc, qüvvə verdi.  Müxtəlif sosioloji tədqiqat mərkəzlərinin  Azərbaycan əhalisi arasında  keçirdiyi sorğular da ölkəmizdə vətəndaşların Prezident İlham Əliyevin rəhbərliyilə həyata keçirilən siyasətə inam və etimad  bəslədiklərini, xalq-iqtidar birliyinin sarsılmaz təməllərə söykəndiyini göstərir. Xalqımız həyata keçirilən səmərəli, məqsədyönlü daxili siyasətin və müstəqil xarici siyasət  kursunun uğurlu nəticələrini  yüksək dəyərləndirir, bu siyasətə alternativ görmür.

Azərbaycan liderinin uğurlu xarici siyasəti və ya  dərin strateji diplomatiyası ölkəmizin   nüfuzunu yüksəldir,  təhlükəsizlik mühitini gücləndirir. Regionda yeni  təhlükəsizlik və əməkdaşlıq formatı məhz Azərbaycanın yaratdığı geosiyasi reallıqlar əsasında formalaşır, proseslər Bakının  iradəsinə uyğun tənzimlənir.  Azərbaycan nəinki öz təhlükəsizliyini təmin edir, hətta regional sabitliyə və inkişafa  mühüm töhfələr verir.

Regionda yeni geosiyasi nizamın məhz  Azərbaycan-Türkiyə strateji  müttəfiqliyi fonunda  təşəkkül tapması da diqqət çəkir. İki dost, qardaş və tərəfdaş ölkə Şuşa  Bəyannaməsini imzalamaqla müttəfiqlik münasibətlərinin  strateji xarakterini və onun ən yüksək  səviyyədə olduğunu bir daha təsdiq etdi.

Ölkəmizin dünya dövlətləri ilə əlaqələri genişlənir. Yeni əməkdaşlıq platformaları buna imkan yaradır.  Azərbaycan daim türk dünyasının birliyinə çağırışlar  edərək bunu atdığı  addımlarla göstərir.

Azərbaycanın bütün məsələlərə münasibətdə nümayiş etdirdiyi ədalətli yanaşma və strateji  baxışları enerji siyasətində daha qabarıq şəkildə  nəzərə çarpır. Dövlət başçısı ölkəmizin prinsipial mövqeyini dəfələrlə diqqətə çatdıraraq bildirib ki,  enerji amili siyasi təzyiq vasitəsi olmamalıdır.  Elə bu səbəbdən də  ölkəmizin qatıldığı bütün transmilli  layihələrdə tərəfdaşların hamısı bərabər hüquqda iştirak edir, bu əməkdaşlıqdan faydalanır. Enerji resursları ilə zəngin olmasına və dünyada  enerji resurslarının ixracatçısı kimi tanınmasına baxmayaraq,  Azərbaycanda bərpaolunan  enerji mənbələrindən  istifadə hər zaman diqqət mərkəzindədir.  Bu istiqamətdə perspektivli layihələr həyata keçirilir.

Azərbaycana inam artıb, ölkəmizə etimad göstərirlər. BMT-dən sonra ikinci ən böyük təsisat, Qoşulmama Hərəkatına 4 il sədrlik edən Azərbaycan bu müddətdə  böyük uğurlara imza atdı, Təhlükəsizlik Şurasına üzv seçildi. Ən möhtəşəm tədbirlərə ev sahibliyi edən ölkəmiz ilin sonlarında iqlim dəyişmələri ilə  mübarizəyə həsr olunmuş daha bir tədbirə - COP29-a da ev sahibi seçilib.  Qeyd edək ki, bu barədə dünya ölkələri yekdilliklə qərar qəbul edib.

30 illik münaqişəyə son qoyan, Qarabağda separatizmin kökünü kəsən, müstəqilliyini, suverenliyini tam təmin edən, Qarabağ və Şərqi Zəngəzuru cənnətə çevirən Azərbaycan bütün hədəflərinə doğru inamla irəliləyir. İrəlidə olmaq isə həmişə zəfərlə nəticələnir.

Nurəngiz Adilqızı.