2020-ci il oktyabrın 20-də Vətən müharibəsinin gedişində Azərbaycan Ordusunun qazandığı uğurlar daha bir mühüm mərhələyə çatdı. Otuz ilə yaxın işğal altında qalan Zəngilan şəhərinin azad edilməsi, eləcə də Füzuli, Cəbrayıl və Xocavənd rayonlarının kəndlərinin düşmən tapdağından qurtarılması həmin günün hərb tariximizdəki yerini müəyyənləşdirdi. Bu qələbələr yalnız cəbhədə irəliləyişin deyil, Azərbaycanın ərazi bütövlüyünün bərpası istiqamətində aparılan mübarizənin ardıcıl və qətiyyətli xarakterinin göstəricisi idi.

Günün əvvəlində Müdafiə Nazirliyinin yaydığı məlumatda cəbhənin Ağdərə–Ağdam, Füzuli–Hadrut-Cəbrayıl və Qubadlı-Zəngilan istiqamətlərində döyüş əməliyyatlarının davam etdiyi bildirildi. Oktyabrın 19-da və 20-nə keçən gecə gedən döyüşlərdə düşmənin canlı qüvvəsinin, iki T-72 tankının, dörd “Qrad” yaylım atəşli reaktiv sisteminin, bir D-30 haubitsasının və beş avtomobil texnikasının məhv edildiyi və ya sıradan çıxarıldığı qeyd olunurdu. Rəsmi məlumatda qoşunlarımızın bütün cəbhə boyu əməliyyat şəraitinə nəzarət etdiyi də vurğulanırdı. Bu mənzərə Azərbaycan Ordusunun hücum təşəbbüsünü əlində saxladığını və qarşıya qoyulan döyüş tapşırıqlarını ardıcıl yerinə yetirdiyini göstərirdi.

Günün ən mühüm xəbəri isə Prezident, Müzəffər Ali Baş Komandan İlham Əliyevin xalqa müraciəti zamanı səsləndi. Dövlət başçısı işğaldan azad edilmiş yeni yaşayış məntəqələrinin adlarını açıqladı. Füzuli rayonunun Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli və Yuxarı Aybasanlı kəndləri, Cəbrayıl rayonunun Safarşa, Həsənqaydı, Fuğanlı, İmambağı, Daş Veysəlli, Ağtəpə və Yarəhmədli kəndləri düşmən işğalından azad edilmişdi.

Xocavənd rayonunda Ağcakənd, Mülküdərə, Daşbaşı, Günəşli və Vəng kəndlərinin azad olunması da həmin günün əlamətdar hadisələri sırasında idi. Dövlət başçısı Vəng kəndinin bundan sonra Çinarlı adlandırılacağını bildirdi. Bu qərar tarixi Azərbaycan torpaqlarında milli toponimlərin bərpası baxımından da xüsusi məna daşıyırdı.

Lakin günün əsas müjdəsi Zəngilanla bağlı idi. Azərbaycan Ordusu rayonun Havalı, Zərnəli, Məmmədbəyli, Həkəri, Şərifan və Muğanlı kəndlərini, eləcə də Zəngilan şəhərini işğaldan azad etmişdi. Prezident İlham Əliyevin Zəngilanın azad olunması xəbərini xalqa çatdırması qələbə sevincini daha da artırdı. Dövlət başçısının “Zəngilan bizimdir! Qarabağ bizimdir!” sözləri həmin günün yaddaşında xüsusi yer tutdu.

Zəngilanın azad edilməsi təsadüfi hərbi uğur deyildi. Araz çayı boyunca yerləşən bu rayonun strateji mövqeyi cəbhənin cənub istiqamətində əməliyyatların inkişafı üçün mühüm əhəmiyyət daşıyırdı. Şəhərin və ətraf kəndlərin azad olunması Azərbaycan Ordusunun irəliləyiş imkanlarını genişləndirir, işğal altındakı digər ərazilərin azad edilməsi uğrunda mübarizədə yeni mərhələnin əsasını qoyurdu. Sonrakı hadisələr də göstərdi ki, Zəngilan istiqamətində qazanılan uğurlar cənub cəbhəsində hərbi təşəbbüsün qorunmasına mühüm töhfə verdi.

Prezidentin müraciətində səsləndirdiyi fikirlərdə qələbənin arxasında dayanan amillər də aydın görünürdü. Dövlət başçısı hər bir kəndin, şəhərin və strateji yüksəkliyin azad edilməsinin böyük peşəkarlıq, cəsarət, igidlik və qəhrəmanlıq tələb etdiyini vurğulayırdı. Bu sözlər cəbhədən gələn xoş xəbərlərin arxasında dayanan ağır döyüşləri, hərbçilərimizin fədakarlığını və Vətən qarşısında məsuliyyətini ifadə edirdi. Azad edilən hər bir yaşayış məntəqəsi xalqın çoxillik həsrətinə son qoymaqla yanaşı, yeni qələbələrə inamı da möhkəmləndirirdi.

Oktyabrın 20-də baş verənlər bir daha sübut etdi ki, Vətən müharibəsində hərbi uğurlar yalnız ərazi baxımından irəliləyişlə ölçülmürdü. Hər azad edilən kənd, hər geri qaytarılan şəhər tarixi ədalətin bərpasına doğru atılan addım idi. Zəngilanın azadlığı isə bu mübarizənin həm hərbi, həm də mənəvi baxımdan əlamətdar səhifəsinə çevrildi.