Türkiyə Qran-Prisinin üçqat qalibi, braziliyalı keçmiş Formula 1 pilotu Felipe Massa 2027-ci ildə yarışın Türkiyəyə qayıdışı ərəfəsində İstanbulda səfərdə olub.

Massa Türkiyə Turizm Təbliğat və İnkişaf Agentliyinin (TGA) təşkil etdiyi proqram çərçivəsində İstanbulda səfərdə olub. Səfər zamanı o, F1 filminin nümayişində iştirak edib, azarkeşlərlə görüşüb və İstanbul Parka qayıdaraq burada qazandığı tarixi qələbələri xatırlayıb.

Felipe Massa 2006, 2007 və 2008-ci illərdə İstanbul Parkda keçirilən Türkiyə Qran-Prilərinin hər üçünü qazanıb. Braziliyalı pilot bütün bu yarışlara poul-pozisiyasından başlayıb. O, Formula 1-də ilk qələbəsini də məhz 2006-cı ildə İstanbul Parkda əldə edib.

Beləliklə, Massa İstanbul Parkda keçirilmiş hər üç Türkiyə Qran-Prisini poul-pozisiyasından başlayaraq qazanan yeganə pilotdur.

Formula 1 karyerası ərzində 11 Qran-Pridə qalib gələn Massa 16 dəfə poul-pozisiyası əldə edib. O, 2008-ci il dünya çempionatını cəmi bir xal fərqlə ikinci pillədə başa vurub və 2017-ci ildə Formula 1 karyerasını başa çatdırıb.

Massa səfər çərçivəsində İstanbulun tarixi yarımadasını da ziyarət edib. O, Ayasofya, Sultanəhməd məscidi, Yerebatan Sarnıcı və Hipodromla tanış olub.

Keçmiş pilot, həmçinin Karaköydən başlayan VIP Boğaz turuna qatılıb və Avropa ilə Asiyanı birləşdirən İstanbul Boğazının mənzərəsi fonunda nahar edib.

Səfərin davamında Massa İstanbul Parka qayıdaraq xüsusi sürüş sessiyasında iştirak edib, media nümayəndələri və azarkeşlərlə görüşüb.

“İstanbul Park mənim üçün həmişə xüsusi məkan olub. Orada keçirdiyim üç ili və yaşadığım hadisələri heç vaxt unutmayacağam. İndi trasın Formula 1-ə qayıdışından əvvəl yenidən İstanbulda olmaq və uzun illərdən sonra azarkeşlərlə görüşmək mənim üçün böyük xoşbəxtlikdir”, – Massa deyib.

FORMULA 1 TURKISH GRAND PRIX 2027 yarışı oktyabrın 1–3-də İstanbul Parkda keçiriləcək.

İstanbul Park 2027-ci ildə Türkiyə Qran-Prisinə 10-cu dəfə ev sahibliyi edəcək. Felipe Massanın səfəri isə yarışın Türkiyəyə qayıdışı ərəfəsində ölkənin beynəlxalq tanıtım kampaniyasının bir hissəsi olub.

Səadət