25 avqust – Xalq şairi Fikrət Qocanın doğum günüdür

Azərbaycan poeziyasının özünəməxsus simalarından olan Xalq şairi Fikrət Qoca zəngin yaradıcılığı və milli ədəbiyyatımıza xidmətləri ilə yaddaşlarda yaşayan sənətkarlardandır. O, 1935-ci il avqustun 25-də Ağdaş rayonunun Kotanarx kəndində anadan olub.

Fikrət Qoca 1960-cı illərdə Azərbaycan poeziyasına gələn və ədəbiyyatımıza yeni nəfəs gətirən şairlər nəslinin tanınmış nümayəndələrindən idi. Onun yaradıcılığında insan və zaman, Vətən və xalq, mənəvi dəyərlər və həyat fəlsəfəsi mühüm yer tutur. Şairin poetik dili sadəliyi, səmimiliyi və dərin məzmunu ilə seçilir.

Fikrət Qocanın yaradıcılıq irsi genişdir. “Qağayı”, “Hamıya borcluyam”, “Dənizdə ay çiməndə”, “Gül ömrü”, “İnsan xasiyyəti”, “Ömürdən səhifələr”, “Mavi dünyanın adamları”, “Sükutun səsi” və digər kitabları onun çoxşaxəli yaradıcılığını əks etdirir. Şair poeziya ilə yanaşı, nəsr və dramaturgiya sahəsində də qələmini sınayıb, tərcüməçilik fəaliyyəti ilə Azərbaycan oxucusunu dünya ədəbiyyatının nümunələri ilə tanış edib.

Onun yaradıcılığında Vətən mövzusu xüsusi əhəmiyyət daşıyır. Fikrət Qoca Azərbaycanın taleyini, xalqımızın azadlıq və istiqlal mübarizəsini, milli-mənəvi dəyərlərimizi öz əsərlərində böyük vətəndaşlıq duyğusu ilə ifadə edib. 20 Yanvar faciəsinə həsr olunmuş əsərlərində xalqımızın yaşadığı ağır sarsıntıları və milli iradəsini bədii sözün gücü ilə əks etdirib.

Fikrət Qoca həm də uzun illər ədəbi-mədəni prosesin fəal iştirakçısı olub. Azərbaycan Yazıçılar Birliyində müxtəlif vəzifələrdə çalışıb, “Qobustan” jurnalına rəhbərlik edib. Onun şeirlərinə bəstələnmiş mahnılar isə poeziyasının daha geniş auditoriyaya çatmasına xidmət edib.

Görkəmli şairin ədəbiyyat qarşısındakı xidmətləri dövlət tərəfindən yüksək qiymətləndirilib. Azərbaycan Respublikasının Prezidenti İlham Əliyevin 1 sentyabr 2015-ci il tarixli Sərəncamı ilə Fikrət Qoca Azərbaycan ədəbiyyatının inkişafında böyük xidmətlərinə görə “Şərəf” ordeni ilə təltif edilib.

2020-ci il avqustun 24-də isə Prezident İlham Əliyevin Sərəncamı ilə Fikrət Qoca Azərbaycan mədəniyyətinin inkişafında xüsusi xidmətlərinə görə “İstiqlal” ordeni ilə təltif olunub. Həmin gün Prezident İlham Əliyev şairə telefonla zəng edərək onu yubileyi münasibətilə təbrik edib və yaradıcılığında uğurlar arzulayıb. Dövlət başçısı Fikrət Qocanın Azərbaycan ədəbiyyatının inkişafındakı xüsusi xidmətlərini, əsərlərinin geniş oxucu auditoriyasında doğurduğu marağı xüsusi qeyd edib.

Fikrət Qocanın 90 illik yubileyinin dövlət səviyyəsində qeyd edilməsi də onun Azərbaycan ədəbiyyatındakı mövqeyinin göstəricisidir. Prezident İlham Əliyevin 8 may 2025-ci il tarixli Sərəncamında şairin milli şeir ənənələrindən və dünya bədii fikrinin nailiyyətlərindən bəhrələnərək özünəməxsus yaradıcılıq üslubu formalaşdırdığı və Azərbaycan poeziyasına yeni ovqat gətirdiyi vurğulanıb.

Fikrət Qocanın yaradıcılıq yolu bir həqiqəti təsdiqləyir: əsl sənətkarın ömrü onun yaşadığı illərlə deyil, yaratdığı əsərlərin xalqın yaddaşında yaşadığı müddətlə ölçülür.

Şairin söz dünyası, Vətən sevgisi, insana və həyata fəlsəfi münasibəti bundan sonra da oxucular üçün mənəvi dəyər olaraq qalacaq.

Nurəngiz Adilqızı